Colossians 3

1ამრიგად, თუკი აღდექით ქრისტესთან ერთად, ეძიეთ ზეციური, სადაც ქრისტე ზის ღვთის მარჯვნივ.

2ზეციურზე იფიქრეთ და არა მიწიერზე.

3ვინაიდან თქვენ მოკვდით და თქვენი სიცოცხლე ქრისტესთან ერთად დაფარულია ღმერთში.

4როდესაც გამოჩნდება ქრისტე, თქვენი სიცოცხლე, მაშინ თქვენც გამოჩნდებით მასთან ერთად დიდებაში.

5ამიტომ მოაკვდინეთ თქვენი მიწიერი ბუნების ასოები: სიძვა, უწმინდურება, ვნება, ბოროტი გულისთქმა და ანგარება, რაც კერპთმსახურებაა.

6რომელთა გამოც მოდის ღვთის რისხვა ურჩობის ძეებზე.

7ოდესღაც თქვენც მათ შორის დადიოდით, როცა მათით ცხოვრობდით.

8ახლა კი განიშორეთ ყოველივე ეს: რისხვა, მძვინვარება, ბოროტება, გმობა და ბილწსიტყვაობა თქვენი ბაგეებიდან.

9ნუ ეცრუებით ერთმანეთს, რაკი შემოიძარცვეთ ძველი ადამიანი მისი საქმეებითურთ

10და შეიმოსეთ ახალი, რომელიც შემეცნებით ახლდება მისი შემოქმედის ხატისამებრ,

11სადაც არ არის არც ბერძენი და არც იუდეველი, არც წინადაცვეთა და არც წინადაუცვეთელობა, არც ბარბაროსი, სკვითი, მონა თუ თავისუფალი, არამედ ქრისტეა ყოველივე და ყოველში.

12ამრიგად, როგორც ღვთის რჩეულებმა, წმიდებმა და საყვარლებმა, შეიმოსეთ მოწყალე გული, სიკეთე, თავმდაბლობა, სიმშვიდე და სულგრძელება.

13შეითმინეთ ერთმანეთი და მიუტევეთ, თუ ვინმეს რაიმე საყვედური აქვს სხვის წინააღმდეგ: როგორც უფალმა მოგიტევათ თქვენ, ასევე თქვენც მიუტევეთ.

14ხოლო ყოველივე ამას ზემოთ შეიმოსეთ სიყვარული, რომელიც სრულყოფილი ერთობის საკვრელია.

15და დაე, ქრისტეს მშვიდობამ იმეფოს თქვენს გულებში, რისთვისაც მოწოდებულნი ხართ ერთ სხეულად; და იყავით მადლიერნი.

16ქრისტეს სიტყვა უხვად დამკვიდრდეს თქვენში ყოველგვარი სიბრძნით; ასწავლეთ და შეაგონეთ ერთმანეთი და მადლიერებით უგალობეთ ღმერთს თქვენს გულებში ფსალმუნებით, ჰიმნებითა და სულიერი საგალობლებით.

17და რასაც კი აკეთებთ სიტყვით თუ საქმით, ყოველივე გააკეთეთ უფალ იესოს სახელით, და მისი მეშვეობით ჰმადლობდეთ მამა ღმერთს.

18ცოლებო, დაემორჩილეთ თქვენს ქმრებს, როგორც შეშვენის უფალში.

19ქმრებო, გიყვარდეთ თქვენი ცოლები და ნუ იქნებით სასტიკნი მათ მიმართ.

20შვილებო, დაემორჩილეთ თქვენს მშობლებს ყველაფერში, რადგან ეს სათნოა უფლისათვის.

21მამებო, ნუ გააღიზიანებთ თქვენს შვილებს, რათა გული არ გაუტყდეთ.

22მონებო, ყველაფერში დაემორჩილეთ თქვენს მიწიერ ბატონებს, არა მხოლოდ დასანახად, ვითარცა ადამიანთმაამებელნი, არამედ გულის სიწრფელითა და უფლის მოშიშებით.

23რასაც კი აკეთებთ, მთელი არსებით აკეთეთ, როგორც უფლისათვის და არა ადამიანთათვის,

24რადგან იცით, რომ უფლისაგან მიიღებთ მემკვიდრეობას საზღაურად; რამეთუ უფალ ქრისტეს ემსახურებით.

25ხოლო ვინც უსამართლოდ იქცევა, მიეზღვება თავისი უსამართლობისამებრ, და არ არსებობს მიკერძოება.