1 Thessalonians 5

1А за времињата и годините, браќа, нема потреба да ви се пишува.

2Зашто самите добро знаете дека Денот Господов ќе дојде како крадец во ноќта.

3Кога ќе велат: „Мир и безбедност“, тогаш ненадејно ќе падне врз нив погибел, како болки врз трудна жена, и нема да избегаат.

4Но вие, браќа, не сте во темнина, та овој ден да ве затекне како крадец.

5Зашто сите вие сте синови на светлината и синови на денот; ние не ѝ припаѓаме на ноќта, ниту на темнината.

6И така, да не спиеме како другите, туку да бидеме будни и трезвени.

7Зашто оние што спијат, ноќе спијат; и оние што се опиваат, ноќе се опиваат.

8А ние, бидејќи му припаѓаме на денот, да бидеме трезвени, облекувајќи го оклопот на верата и љубовта, и шлемот на нашата надеж за спасение.

9Зашто Бог не нè одреди за гнев, туку за да придобиеме спасение преку нашиот Господ Исус Христос,

10Кој умре за нас, та било да сме будни или да спиеме, да живееме заедно со Него.

11Затоа утешувајте се и изградувајте се еден со друг, како што и правите.

12Ве молиме пак, браќа, да ги признавате оние што се трудат меѓу вас, кои се ваши претстојници во Господа и ве поучуваат,

13и со љубов премногу да ги почитувате поради нивното дело. Живејте во мир меѓу себе.

14Ве молиме уште, браќа, опоменувајте ги неуредните, тешете ги малодушните, помагајте им на немоќните и бидете трпеливи кон сите.

15Внимавајте никој никому да не му враќа зло за зло, туку секогаш одете по доброто, како еден кон друг, така и кон сите луѓе.

16Радувајте се секогаш.

17Молете се без престан.

18Благодарете во секоја околност, зашто тоа е Божјата волја за вас во Христа Исуса.

19Духот не Го гаснете.

20Не презирајте ги пророштвата,

21туку испитувајте сѐ. Држете се цврсто за доброто.

22Воздржувајте се од секаков облик на зло.

23А Самиот Бог на мирот нека ве освети наполно, и целиот ваш дух, душа и тело нека се зачуваат беспрекорни при доаѓањето на нашиот Господ Исус Христос.

24Верен е Оној Кој ве повикува, и Тој ќе го направи тоа.

25Браќа, молете се и за нас.

26Поздравете ги сите браќа со свет целив.

27Ве заколнувам пред Господа ова писмо да им се прочита на сите браќа.

28Благодатта на нашиот Господ Исус Христос нека биде со вас.