1 Thessalonians 5

1Ond am yr amseroedd a’r prydiau, frodyr, nid rhaid i ni ysgrifennu atoch.

2Canys chwi eich hunain a wyddoch yn hysbys ddyfod Dydd yr Arglwydd fel lleidr yn y nos.

3Tra byddant yn dywedyd, “Heddwch a diogelwch,” yna y daw distryw disymwth arnynt, megis gwewyr esgor ar feichiog, ac ni ddiangant.

4Ond chwychwi, frodyr, nid ydych mewn tywyllwch, fel y goddiweddai’r dydd hwnnw chwi fel lleidr.

5Canys meibion y goleuni ydych chwi oll, a meibion y dydd; nid ydym o’r nos nac o’r tywyllwch.

6Am hynny na chwsgwn fel y lleill, ond gwyliwn a byddwn sobr.

7Canys y rhai sydd yn cysgu, yn y nos y maent yn cysgu; a’r rhai sydd yn meddwi, yn y nos y maent yn meddwi.

8Ond gan ein bod o’r dydd, byddwn sobr, gan wisgo dwyfronneg ffydd a chariad, ac yn helm, gobaith iachawdwriaeth.

9Canys nid ordeiniodd Duw nyni i ddioddef digofaint, ond i gael iachawdwriaeth trwy ein Harglwydd Iesu Grist.

10Yr Hwn a fu farw drosom, fel, pa un bynnag a fyddom effro ai cysgu, y byddom fyw ynghyd ag Ef.

11Am hynny cysurwch eich gilydd ac adeiladwch bob un ei gilydd, yn union fel yr ydych eisoes yn gwneuthur.

12Ac yr ydym yn erfyn arnoch, frodyr, i adnabod y rhai sydd yn llafurio yn ddyfal yn eich plith, ac yn gofalu amdanoch yn yr Arglwydd, ac yn eich rhybuddio.

13Mewn cariad, parchwch hwynt yn fawr iawn er mwyn eu gwaith. Byddwch heddychlon yn eich plith eich hunain.

14Ac yr ydym yn eich annog, frodyr, rhybuddiwch y rhai annhrefnus, calonogwch y rhai digalon, cynorthwywch y gwan, a byddwch amyneddgar tuag at bawb.

15Gwelwch na thalo neb ddrwg am ddrwg i neb. Dilynwch yn wastad yr hyn sydd dda i’ch gilydd ac i bob dyn.

16Llawenhewch bob amser.

17Gweddïwch yn ddi-baid.

18Diolchwch ym mhob amgylchiad, canys hyn yw ewyllys Duw i chwi yng Nghrist Iesu.

19Na ddiffoddwch yr Ysbryd.

20Na dirmygwch broffwydoliaethau,

21ond profwch bob peth. Daliwch yn gadarn at yr hyn sydd dda.

22Ymogelwch rhag pob math o ddrwg.

23A Duw’r heddwch ei Hun a’ch sancteiddio’n llwyr, a chadwer eich holl ysbryd, enaid, a chorff yn ddi-fai ar ddyfodiad ein Harglwydd Iesu Grist.

24Ffyddlon yw’r Hwn sy’n eich galw, ac Ef a’i gwna.

25Frodyr, gweddïwch drosom ninnau hefyd.

26Cyfarchwch yr holl frodyr â chusan sanctaidd.

27Yr wyf yn eich tynghedu gerbron yr Arglwydd ar ddarllen y llythyr hwn i’r holl frodyr.

28Gras ein Harglwydd Iesu Grist a fo gyda chwi.