1 Peter 5

1Gẹ́gẹ́ bí alàgbà ẹlẹgbẹ́ yín, àti ẹlẹ́rìí ìyà Kristi, àti alábàápín nínú ògo tí a óò fihàn, mo bẹ ẹ̀yin alàgbà tí ń bẹ láàárín yín:

2Ẹ máa ṣe olùṣọ́ agbo Ọlọ́run tí ń bẹ láàárín yín, ẹ máa ṣe ìtọ́jú rẹ̀ kì í ṣe pẹ̀lú àfipáṣe, bí kò ṣe pẹ̀lú tinútinú, gẹ́gẹ́ bí Ọlọ́run ti fẹ́; kì í ṣe nítorí èrè àlékún, bí kò ṣe pẹ̀lú ìmúrasílẹ̀ ọkàn;

3kì í ṣe bí àwọn tí ń jẹ olúwa lórí àwọn tí a fi lé yín lọ́wọ́, bí kò ṣe nípa jíjẹ́ àpẹẹrẹ fún agbo náà.

4Nígbà tí Olórí Olùṣọ́-àgùntàn yóò sì fi ara hàn, ẹ̀yin yóò gba adé ògo tí kì í rẹ̀ dánù láéláé.

5Bẹ́ẹ̀ gẹ́gẹ́, ẹ̀yin ọ̀dọ́mọkùnrin, ẹ tẹríba fún àwọn alàgbà. Gbogbo yín pẹ̀lú, ẹ di ara yín ní àmùrè ìrẹ̀lẹ̀ sí ara yín lẹ́nìkínníkejì, nítorí pé, “Ọlọ́run kọ ojú ìjà sí àwọn agbéraga, ṣùgbọ́n Ó ń fi oore-ọ̀fẹ́ fún àwọn onírẹ̀lẹ̀.”

6Nítorí náà, ẹ rẹ ara yín sílẹ̀ lábẹ́ ọwọ́ agbára Ọlọ́run, kí Ó lè gbé yín ga ní àkókò tí ó yẹ.

7Ẹ kó gbogbo àníyàn yín lé E lórí, nítorí Ó ń ṣe ìtọ́jú yín.

8Ẹ wà ní àròjinlẹ̀, ẹ máa ṣọ́nà. Ọ̀tá yín Èṣù ń rìn kiri bí kìnnìún tí ń ké ramúramù, ó ń wá ẹni tí yóò gbé mì.

9Ẹ kọ ojú ìjà sí i, kí ẹ dúró ṣinṣin nínú ìgbàgbọ́ yín, ní mímọ̀ pé irú ìyà kan náà ni àwọn arákùnrin yín tí ń bẹ lágbàáyé ń jẹ.

10Lẹ́yìn tí ẹ̀yin bá sì ti jìyà fún ìgbà díẹ̀, Ọlọ́run gbogbo oore-ọ̀fẹ́, ẹni tí ó ti pè yín sí inú ògo Rẹ̀ ayérayé nínú Kristi, Òun tìkára Rẹ̀ yóò sọ yín di pípé, yóò fi ẹsẹ̀ yín múlẹ̀, yóò fún yín ní agbára, yóò sì fi ìdí yín múlẹ̀ gbọingbọin.

11Ti Rẹ̀ ni agbára láé àti láéláé. Àmín.

12Nípa ọwọ́ Silfanusi, ẹni tí mo kà sí arákùnrin olódodo, ni mo ti kọ̀wé kékeré yìí sí yín, mo ń gba yín níyànjú, mo sì ń jẹ́rìí pé èyí ni tòótọ́ oore-ọ̀fẹ́ Ọlọ́run. Ẹ dúró ṣinṣin nínú rẹ̀.

13Ìjọ tí ń bẹ ní Babilónì, tí a yàn pẹ̀lú yín, kí yín; bẹ́ẹ̀ sì ni Máàkù ọmọ mi.

14Ẹ fi ifẹnukonu ifẹ kí ara yín. Alafia fun gbogbo yín tí ń bẹ ninu Kristi.