1 Peter 5

1زه چې خپله یو مشر، د مسیح د کړاوونو شاهد، او د هغه جلال برخه وال یم چې ښکاره کېدونکی دی، ستاسو په منځ کې مشرانو ته زارۍ کوم:

2د خدای د هغې رمې شپانه شئ چې ستاسو په منځ کې ده، د هغې ساتنه نه د جبر له مخې، بلکې په خپله خوښه وکړئ لکه څنګه چې د خدای رضا ده؛ نه د ناوړه ګټې په تمه، بلکې په پوره لېوالتیا سره؛

3نه په هغو کسانو باندې په حاکمیت کولو سره چې تاسو ته سپارل شوي دي، بلکې رمې ته پخپله نمونه او مثال جوړ شئ.

4او کله چې لوی شپون راڅرګند شي، نو تاسو به د جلال هغه تاج ترلاسه کړئ چې هیڅکله به مړاوی نه شي.

5په همدې توګه ای ځوانانو، د خپلو مشرانو تابع اوسئ. او تاسو ټول د یو بل په وړاندې د عاجزۍ جامې واغوندئ، ځکه چې: «خدای د مغرورانو مخالفت کوي، خو عاجزانو ته فضل وربښي.»

6نو ځکه د خدای تر قادر مطلق لاس لاندې ځانونه عاجز کړئ، ترڅو هغه تاسو په خپل ټاکلي وخت کې لوړ کړي.

7خپله ټوله اندېښنه په هغه باندې واچوئ، ځکه چې هغه ستاسو پام ساتي.

8هوښیار او بیدار اوسئ. ستاسو دښمن، ابلیس، د زمري غوندې په غړمبېدو ګرځي او د داسې چا په لټه کې دی چې ویې خوري.

9په خپل ایمان کې کلک او ثابت د هغه په وړاندې ودرېږئ، په دې پوهېدو سره چې ستاسو ایمانداره وروڼه په ټوله نړۍ کې په همدې ډول کړاوونو اخته دي.

10او وروسته له دې چې تاسو لږ څه کړاو وګالئ، د ټول فضل خدای، چا چې تاسو په مسیح کې خپل ابدي جلال ته بللي یاست، پخپله به تاسو بشپړ، ثابت، پیاوړي او استوار کړي.

11هغه لره دې قدرت وي تر ابده او تر تلپاتې پورې. آمین.

12د سِلوَنوس په لاس، چې زه یې یو وفادار ورور ګڼم، ما تاسو ته دا لنډ لیک ولیکه، ترڅو تاسو وهڅوم او شاهدي ورکړم چې دا د خدای رښتینی فضل دی. په دې فضل کې ثابت پاتې شئ.

13په بابل کې هغه کلیسا چې ستاسو سره یوځای غوره شوې ده، او همدارنګه زما زوی مرقوس، تاسو ته سلامونه وايي.

14یو بل ته د مینې په ښکلولو سلام ورکړئ. په تاسو ټولو باندې چې په مسیح کې یاست، سلامتي دې وي.