1 Peter 5

1Өзүм да аксакал, Машаяктын азаптарынын күбөсү жана ачыла турган даңктын катышуучусу катары араңардагы аксакалдарга кайрылам:

2Араңардагы Кудайдын үйүрүн кайтаргыла, аны аргасыздан эмес, Кудай каалагандай чын ыкластан, арам пайда үчүн эмес, жан-дилиңер менен көзөмөлдөгүлө;

3силерге тапшырылгандардын үстүнөн өкүмдарлык кылбастан, үйүргө өрнөк болгула.

4Ошондо Башкы Кайтаруучу көрүнгөндө, соолубас даңк таажысын аласыңар.

5Ошондой эле, силер, жаштар, аксакалдарга баш ийгиле. Баарыңар бири-бириңерге карата момундукту кийинип алгыла, анткени: «Кудай текеберлерге каршы турат, ал эми момундарга ырайым берет».

6Ошондуктан өз убагы келгенде Ал силерди жогору көтөрүшү үчүн, Кудайдын кудуреттүү колунун астында өзүңөрдү төмөн кармагыла.

7Бардык түйшүгүңөрдү Ага арткыла, анткени Ал силердин камыңарды көрөт.

8Сергек жана сак болгула. Силердин каршылашыңар шайтан кимди жутуп жиберерин издеп, арылдаган арстандай айланып жүрөт.

9Дүйнө жүзүндөгү бир туугандарыңар да дал ушундай азаптарды башынан кечирип жатканын билип, ишенимде бекем туруп, ага каршылык көрсөткүлө.

10Силер бир аз убакыт азап тарткандан кийин, силерди Машаякта Өзүнүн түбөлүктүү даңкына чакырган бүт ырайымдын Кудайы Өзү силерди калыбына келтирет, бекемдейт, күчтөндүрөт жана туруктуу кылат.

11Ага түбөлүктөн түбөлүккө бийлик болсун. Оомийин.

12Мен ишенимдүү бир тууган катары санаган Силван аркылуу силерди кайраттандырып жана Кудайдын чыныгы ырайымы ушул экенине күбөлөндүрүп, кыскача жаздым. Анда бекем тургула.

13Бабылдагы силер менен бирге тандалган Жыйын жана уулум Марк силерге салам жолдойт.

14Бири-бириңер менен сүйүү өбүүсү аркылуу саламдашкыла. Машаяктагы баарыңарга тынчтык болсун.