1 Peter 5

1Өзім де серіктес ақсақал, Мәсіхтің шеккен азаптарының куәгері әрі ашылатын салтанаттың ортақтасы ретінде араларыңдағы ақсақалдарға жалбарынамын:

2Қол астыларыңдағы Құдайдың отарын бағыңдар, оны мәжбүрліктен емес, Құдай қалағандай өз еріктеріңмен, арам пайда табу құмарлығымен емес, ынтық ықыласпен қадағалаңдар;

3өздеріңе сеніп тапсырылғандарға өктемдік жүргізбей, отарға үлгі болыңдар.

4Сонда Бас Бағушы аян болған шақта ешқашан солмайтын салтанат тәжін иеленесіңдер.

5Сол секілді, жастар, ақсақалдарға бағыныңдар. Барлығың да өзара қарым-қатынаста кішіпейілділікті жамылыңдар, өйткені «Құдай тәкаппарларға қарсы тұрады, ал кішіпейілдерге рақымын төгеді».

6Ендеше, өз уақытында Ол сендерді жоғарылатуы үшін, Құдайдың құдіретті қолының астында кішірейіңдер.

7Барлық уайым-қайғыларыңды Оған артыңдар, өйткені Ол сендерге қамқорлық жасайды.

8Сергек те қырағы болыңдар. Қарсыластарың — ібіліс жұтып қояр жанды іздеп, ақырған арыстандай айнала торып жүр.

9Дүние жүзіндегі бауырластарыңның да дәл осындай азаптарды бастан кешіріп жатқанын біле отырып, оған сенімде берік тұрып қарсы шығыңдар.

10Сендер біршама уақыт азап шеккеннен кейін, сендерді Мәсіх арқылы Өзінің мәңгілік салтанатына шақырған барша рақымның Құдайы Өзі сендерді жетілдіреді, бекітеді, нығайтады және берік орнықтырады.

11Оған ғасырлардан ғасырларға билік бұйырсын. Аумин.

12Сенімді бауырлас деп білетін Силван арқылы сендерге қысқаша жазып, жігер бердім әрі мұның Құдайдың шынайы рақымы екенін куәландырдым. Осы рақымда берік тұрыңдар.

13Сендермен бірге таңдалған Бабылдағы қауым және менің рухани ұлым Марқа сендерге сәлем жолдайды.

14Бір-біріңе сүйіспеншілік сүйісімен сәлем беріңдер. Мәсіхтегі баршаңа тыныштық болсын.