1 Peter 5

1Որպես երեցակից, Քրիստոսի չարչարանքների վկա և հայտնվելիք փառքի հաղորդակից՝ աղաչում եմ ձեր միջի երեցներին.

2Արածեցրե՛ք Աստծո հոտը, որ ձեր մեջ է, վերակացու լինելով ոչ թե հարկադրաբար, այլ կամովին՝ ըստ Աստծո. ոչ թե շահամոլությամբ, այլ հոժարությամբ,

3ոչ թե տիրաբար իշխելով ձեզ վստահվածների վրա, այլ օրինակ լինելով հոտին:

4Եվ երբ Հովվապետը հայտնվի, դուք կստանաք փառքի անթառամ պսակը:

5Նույնպես և դուք, երիտասարդնե՛ր, հնազանդվեցե՛ք երեցներին. և բոլորդ միմյանց հանդեպ խոնարհությո՛ւն զգեցեք, քանզի «Աստված հակառակ է ամբարտավաններին, բայց խոնարհներին շնորհ է տալիս»:

6Արդ, խոնարհվեցե՛ք Աստծո հզոր ձեռքի տակ, որպեսզի Նա ժամանակին բարձրացնի ձեզ:

7Ձեր ամբողջ հոգսը Նրա վրա՛ գցեք, որովհետև Նա հոգ է տանում ձեր մասին:

8Արթո՛ւն եղեք և հսկեցե՛ք. ձեր ոսոխը՝ սատանան, մռնչացող առյուծի պես շրջում է՝ փնտրելով, թե ում կուլ տա:

9Դիմադրեցե՛ք նրան՝ հաստատուն լինելով հավատքի մեջ և իմանալով, որ նույն չարչարանքներն են կրում ձեր եղբայրներն ամբողջ աշխարհում:

10Եվ ամենայն շնորհների Աստվածը, որ կանչեց ձեզ Իր հավիտենական փառքին Քրիստոսի մեջ, ձեր կարճատև չարչարանքներից հետո Ինքը կկատարելագործի, կհաստատի, կզորացնի և անսասան կդարձնի ձեզ:

11Նրան լինի զորությունը հավիտյանս հավիտենից: Ամեն:

12Սիղվանոսի միջոցով, որին ես համարում եմ հավատարիմ եղբայր, համառոտ գրեցի ձեզ՝ քաջալերելով և վկայելով, որ սա՛ է Աստծո ճշմարիտ շնորհը: Հաստատո՛ւն մնացեք նրա մեջ:

13Ձեզ ողջունում է Բաբելոնում եղող եկեղեցին՝ ձեզ հետ ընտրված, ինչպես նաև իմ որդի Մարկոսը:

14Ողջունեցէ՛ք միմյանց սիրո համբույրով։ Խաղաղությո՛ւն ձեզ բոլորիդ, որ Քրիստոսի մեջ եք։