1 Peter 5

1እኔ አብሬአቸው ሽማግሌ፣ የክርስቶስ መከራ ምስክርና ሊገለጥ ካለው ክብር ተካፋይ የሆንሁ፣ በመካከላችሁ ያሉትን ሽማግሌዎች እለምናቸዋለሁ፤

2በእናንተ ዘንድ ያለውን የእግዚአብሔርን መንጋ ጠብቁ፤ እንደ እግዚአብሔር ፈቃድ በፈቃደኝነት እንጂ በግድ ሳይሆን፣ በመጥፎ ረብ ለማግኘት ሳይሆን በበጎ ፈቃድ ተንከባከቧቸው፤

3ለመንጋው ምሳሌ ሁኑ እንጂ በእናንተ አደራ ላይ ባሉት ላይ ጌቶች አትሁኑባቸው።

4የእረኞችም አለቃ በሚገለጥበት ጊዜ የማያልፈውን የክብር አክሊል ትቀበላላችሁ።

5እንዲሁም ጐበዞች ሆይ፣ ለሽማግሌዎች ተገዙ። ሁላችሁም እርስ በርሳችሁ ትሕትናን ልበሱ፤ ምክንያቱም «እግዚአብሔር ትዕቢተኞችን ይቃወማል፣ ለትሑታን ግን ጸጋን ይሰጣል።»

6እንግዲህ በጊዜው ከፍ እንዲያደርጋችሁ ከኃይለኛው ከእግዚአብሔር እጅ በታች ራሳችሁን አዋርዱ፤

7እርሱ ስለ እናንተ ያስባልና፣ የሚያስጨንቃችሁን ሁሉ በእርሱ ላይ ጣሉት።

8በመጠን ኑሩ፣ ንቁም። ባላጋራችሁ ዲያብሎስ የሚውጠውን ፈልጎ እንደሚያገሣ አንበሳ ይዞራልና፤

9በዓለም ዙሪያ ያሉ ወንድሞቻችሁ ያንኑ ዓይነት መከራ እየተቀበሉ እንደ ሆነ እያወቃችሁ፣ በእምነታችሁ ጸንታችሁ ተቃወሙት።

10ለጥቂት ጊዜ መከራን ከተቀበላችሁ በኋላ፣ በክርስቶስ ወደ ዘላለም ክብሩ የጠራችሁ የጸጋ ሁሉ አምላክ ራሱ ፍጹማን ያደርጋችኋል፣ ያጸናችኋል፣ ያበረታችኋል፣ ይመሠርታችሁማል።

11ለእርሱ ኃይል ከዘላለም እስከ ዘላለም ይሁን፤ አሜን።

12የታመነ ወንድም እንደ ሆነ በቈጠርሁት በስልዋኖስ እጅ፣ ይህ እውነተኛ የእግዚአብሔር ጸጋ እንደ ሆነ እየመከርኋችሁና እየመሰከርሁላችሁ በአጭሩ ጽፌላችኋለሁ፤ በዚህ ጸንታችሁ ቁሙ።

13ከእናንተ ጋር አብራ የተመረጠች በባቢሎን ያለች ቤተ ክርስቲያን፣ ልጄም ማርቆስ ሰላምታ ያቀርቡላችኋል።

14በፍቅር አሳሳም እርስ በርሳችሁ ሰላምታ ተሰጣጡ። በክርስቶስ ላላችሁ ለሁላችሁ ሰላም ይሁን።