1 John 3

1Ẹ wò irú ìfẹ́ ńlá tí Baba ti fi fún wa, pé kí a máa pè wá ní àwọn ọmọ Ọlọ́run. Èyí sì ni ohun tí a jẹ́! Ìdí tí ayé kò fi mọ̀ wá ni pé kò mọ Òun.

2Ẹ̀yin olùfẹ́, ọmọ Ọlọ́run ni wá nísinsìnyí, ohun tí a ó sì dà kò tíì farahàn. A mọ̀ pé nígbà tí Kristi bá farahàn, a ó dàbí Rẹ̀, nítorí pé a ó rí I gẹ́gẹ́ bí Ó ti wà.

3Àti olúkúlùkù ẹni tí ó ní ìrètí yìí nínú Rẹ̀ ń sọ ara rẹ̀ di mímọ́, gẹ́gẹ́ bí Kristi ti jẹ́ mímọ́.

4Ẹnikẹ́ni tí ń dẹ́ṣẹ̀ ń dẹ́ṣẹ̀ sí òfin pẹ̀lú. Nítòótọ́, ẹ̀ṣẹ̀ ni àìlófin.

5Ṣùgbọ́n ẹ̀yin mọ̀ pé Kristi farahàn láti mú àwọn ẹ̀ṣẹ̀ kúrò, kò sì sí ẹ̀ṣẹ̀ kankan nínú Rẹ̀.

6Kò sí ẹnikẹ́ni tí ń gbé inú Rẹ̀ tí ń tẹ̀síwájú nínú ẹ̀ṣẹ̀. Kò sí ẹnikẹ́ni tí ń tẹ̀síwájú láti dẹ́ṣẹ̀ tí ó ti rí I tàbí tí ó ti mọ̀ Ọ́n.

7Ẹ̀yin ọmọ kéékèèké, kí ẹnikẹ́ni má ṣe tàn yín jẹ: Ẹni tí ń hùwà òdodo jẹ́ olódodo, gẹ́gẹ́ bí Kristi ti jẹ́ olódodo.

8Ẹni tí ń dẹ́ṣẹ̀ jẹ́ ti èṣù, nítorí èṣù ti ń dẹ́ṣẹ̀ láti ìbẹ̀rẹ̀pẹ̀pẹ̀ wá. Nítorí èyí ni a ṣe fi Ọmọ Ọlọ́run hàn, láti pa àwọn iṣẹ́ èṣù run.

9Ẹnikẹ́ni tí a bí nípasẹ̀ Ọlọ́run kọ̀ láti máa dẹ́ṣẹ̀, nítorí pé irúgbìn Ọlọ́run ń gbé inú rẹ̀; kò sì lè máa dẹ́ṣẹ̀ nìṣó, nítorí pé a ti bí i nípasẹ̀ Ọlọ́run.

10Nípa èyí ni a fi ń mọ àwọn ọmọ Ọlọ́run yàtọ̀ sí àwọn ọmọ èṣù: Ẹnikẹ́ni tí kò bá hùwà òdodo kì í ṣe ti Ọlọ́run, bẹ́ẹ̀ sì ni ẹnikẹ́ni tí kò nífẹ̀ẹ́ arákùnrin rẹ̀.

11Èyí ni iṣẹ́ tí ẹ̀yin ti gbọ́ láti ìbẹ̀rẹ̀ wá: Pé kí a fẹ́ràn ara wa lẹ́nìkíníkejì.

12Kí a má ṣe dàbí Kéènì, ẹni tí ó jẹ́ ti ẹni ibi náà tí ó sì pa arákùnrin rẹ̀. Èé sì ti ṣe tí Kéènì fi pa á? Nítorí pé àwọn iṣẹ́ tirẹ̀ jẹ́ ibi, ṣùgbọ́n ti arákùnrin rẹ̀ jẹ́ òdodo.

13Nítorí náà ẹ má ṣe jẹ́ kí ó yà yín lẹ́nu, ẹ̀yin ará, bí ayé bá kórìíra yín.

14Àwa mọ̀ pé a ti rékọjá láti inú ikú bọ́ sí inú ìyè, nítorí tí a fẹ́ràn àwọn ará wa. Ẹni tí kò bá ní ìfẹ́ ń gbé inú ikú síbẹ̀.

15Ẹnikẹ́ni tí ó bá kórìíra arákùnrin rẹ̀, apànìyàn ni, ẹ̀yin sì mọ̀ pé kò sí apànìyàn tí ó ní ìyè àìnípẹ̀kun tí ń gbé inú rẹ̀.

16Nípa èyí ni àwa mọ ohun tí ìfẹ́ jẹ́: Jesu fi ẹ̀mí Rẹ̀ lélẹ̀ fún wa, ó sì yẹ fún àwa pẹ̀lú láti fi ẹ̀mí wa lélẹ̀ fún àwọn ará.

17Ṣùgbọ́n bí ẹnikẹ́ni bá ní ohun ìní ayé yìí, tí ó sì rí arákùnrin rẹ̀ tí ó wà nínú àìní, tí ó sì káwọ́ ìyọ́nú rẹ̀ mọ́ kúrò lọ́dọ̀ rẹ̀, báwo ni ìfẹ́ Ọlọ́run ṣe lè gbé inú rẹ̀?

18Ẹ̀yin ọmọ mi kékeré, ẹ má ṣe jẹ́ kí a fẹ́ràn ní ọ̀rọ̀ tàbí ní ahọ́n lásán, bí kò ṣe ní ìṣe àti ní òtítọ́.

19Àti nípa èyí ni àwa yóò mọ̀ pé ti òtítọ́ ni wá, a ó sì fi ọkàn wa balẹ̀ níwájú Rẹ̀:

20Bí ọkàn wa bá tilẹ̀ lẹ́bi fún wa, Ọlọ́run tóbi ju ọkàn wa lọ, Oun sì mọ ohun gbogbo.

21Ẹ̀yin olùfẹ́, bí ọkàn wa kò bá dẹ́bi fún wa, àwa ní ìgboyà níwájú Ọlọ́run,

22ohunkóhun tí a bá sì béèrè ni àwa yóò rí gbà láti ọ̀dọ̀ Rẹ̀, nítorí tí àwa ń pa àwọn àṣẹ Rẹ̀ mọ́, tí a sì ń ṣe àwọn ohun tí ó dùn mọ́ Ọ nínú.

23Èyí sì ni àṣẹ Rẹ̀: pé kí a gba orúkọ Ọmọ Rẹ̀, Jesu Kristi gbọ́, kí a sì fẹ́ràn ara wa lẹ́nìkíníkejì, gẹ́gẹ́ bí O ti pa á láṣẹ fún wa.

24Ẹnikẹ́ni tí ó bá sì ń pa àwọn àṣẹ Rẹ̀ mọ́ ń gbé inú Ọlọ́run, Ọlọ́run sì ń gbé inú rẹ̀. Nípa èyí ni àwa sì mọ̀ pé Oun ń gbé inú wa: nípa Ẹ̀mí tí O ti fi fún wa.