1 John 3

1Әкенің бізге деген сүйіспеншілігі қандай зор екенін көріңдерші: біз Құдайдың балалары деп аталамыз, шын мәнінде де солаймыз! Осы дүниенің бізді білмейтін себебі — Оны білмегендігінде.

2Сүйіктілерім, біз қазір Құдайдың балаларымыз, бірақ болашақта қандай болатынымыз әлі ашылған жоқ. Біз Мәсіх көрінген кезде Оған ұқсайтынымызды білеміз, өйткені Оны Ол қандай болса, солай көретін боламыз.

3Оған деген осындай үміті бар әркім Мәсіх қалай таза болса, өзін де солай тазартады.

4Күнә жасайтын әркім заңсыздық та жасайды. Расында да, күнә — бұл заңсыздық.

5Бірақ сендер Мәсіхтің күнәларды алып тастау үшін келгенін және Онда ешбір күнә жоқ екенін білесіңдер.

6Оның бойында қалатын ешкім күнә жасауын жалғастырмайды. Күнә жасауын тоқтатпаған ешкім Оны көрген де, Оны таныған да емес.

7Балаларым, сендерді ешкім алдап кетпесін: Әділдік жасайтын адам Мәсіх қалай әділ болса, солай әділ.

8Күнә жасайтын адам ібілістен, өйткені ібіліс әуел бастан күнә жасап келеді. Құдай Ұлының келу себебі — ібілістің істерін күйрету.

9Құдайдан туған әркім күнә жасаудан бас тартады, өйткені оның бойында Құдайдың тұқымы сақталады; ол күнә жасай бере алмайды, себебі Құдайдан туған.

10Құдайдың балалары мен ібілістің балалары осыдан танылады: Әділдік жасамайтын әрбір адам Құдайдан емес, өз бауырын сүймейтін адам да Одан емес.

11Бастапқыдан бері сендердің естіген хабарларың мынау: Біз бір-бірімізді сүюіміз керек.

12Жауызға тән болып, өз бауырын өлтірген Қайын тәрізді болмаңдар. Қайын оны не үшін өлтірді? Өйткені өз істері зұлым, ал бауырының істері әділ еді.

13Сондықтан, бауырластар, егер осы дүние сендерді жек көрсе, таңғалмаңдар.

14Біз өлімнен өмірге өткенімізді білеміз, өйткені бауырларымызды сүйеміз. Сүйіспеншілігі жоқ жан өлімде қала береді.

15Өз бауырын жек көретін әркім — кісі өлтіруші, ал ешбір кісі өлтірушінің бойында мәңгілік өмірдің тұрақтамайтынын білесіңдер.

16Сүйіспеншіліктің не екенін мынадан білеміз: Иса біз үшін Өз жанын қиды, біз де бауырластарымыз үшін жанымызды қиюға тиіспіз.

17Егер дүние-мүлкі бар адам мұқтаждықтағы бауырын көре тұра, оған жаны ашымаса, онда Құдайдың сүйіспеншілігі қалайша оның бойында болсын?

18Балаларым, сөзбен және тілмен ғана емес, іспен және шындықпен сүйейік.

19Шындыққа жататынымызды осыдан білеміз және жүрегімізді Оның алдында орнықтырамыз:

20Жүрегіміз бізді айыптаған күннің өзінде де, Құдай жүрегімізден жоғары және Ол барлық нәрсені біледі.

21Сүйіктілерім, егер жүрегіміз бізді айыптамаса, Құдайдың алдында нық сенімдеміз,

22әрі Одан не сұрасақ та аламыз, өйткені Оның өсиеттерін сақтап, Оның алдында ұнамдыны істейміз.

23Оның өсиеті мынау: Оның Ұлы Иса Мәсіхтің есіміне сенуіміз және Ол бізге бұйырғандай бір-бірімізді сүюіміз керек.

24Кім Оның өсиеттерін сақтаса, сол Құдайда болады, ал Құдай оның бойында болады. Оның біздің бойымызда екенін Ол бізге берген Рух арқылы білеміз.