1 John 3

1ნახეთ, რაოდენი სიყვარული მოგვმადლა მამამ, რათა ღვთის შვილებად ვიწოდებოდეთ. და ვართ კიდეც! წუთისოფელი იმიტომ არ გვიცნობს ჩვენ, რომ არ იცნო იგი.

2საყვარელნო, ახლა ღვთის შვილები ვართ, და ჯერ კიდევ არ გაცხადებულა, რანი ვიქნებით. ვიცით, რომ როცა გამოჩნდება ქრისტე, მისი მსგავსნი ვიქნებით, რადგან ვიხილავთ მას ისეთს, როგორიც არის.

3და ყოველი, ვისაც ეს იმედი აქვს მასში, განიწმენდს თავს, ისევე როგორც ქრისტეა წმინდა.

4ყოველი, ვინც სცოდავს, ურჯულოებასაც სჩადის. მართლაც, ცოდვა ურჯულოებაა.

5თქვენ კი იცით, რომ ქრისტე გამოჩნდა ცოდვების წასაღებად, და მასში არ არის ცოდვა.

6არავინ, ვინც მასში მკვიდრობს, არ სცოდავს. არავის, ვინც განაგრძობს ცოდვას, არ უხილავს იგი და არც უცნია იგი.

7შვილებო, ნურავინ შეგაცდენთ: სიმართლის მქმნელი მართალია, ისევე როგორც ქრისტეა მართალი.

8ცოდვის მქმნელი ეშმაკისგანაა, რადგან ეშმაკი თავიდანვე სცოდავს. სწორედ ამისთვის გამოჩნდა ძე ღვთისა, რათა დაარღვიოს ეშმაკის საქმეები.

9ყოველი, ვინც ღვთისგანაა შობილი, უარს ამბობს ცოდვის ჩადენაზე, რადგან ღვთის თესლი მკვიდრობს მასში; და არ შეუძლია განაგრძოს ცოდვა, რადგან ღვთისგან არის შობილი.

10ამით განირჩევიან ღვთის შვილები და ეშმაკის შვილები: ყოველი, ვინც არ იქმს სიმართლეს, არ არის ღვთისგან, ისევე როგორც ის, ვისაც არ უყვარს თავისი ძმა.

11ეს არის უწყება, რომელიც თავიდანვე მოისმინეთ: უნდა გვიყვარდეს ერთმანეთი.

12ნუ იქნებით კაენის მსგავსნი, რომელიც ბოროტს ეკუთვნოდა და მოკლა თავისი ძმა. და რატომ მოკლა იგი კაენმა? იმიტომ, რომ მისი საკუთარი საქმეები ბოროტი იყო, ხოლო მისი ძმისა — მართალი.

13ნუ გიკვირთ, ძმებო, თუ ქვეყანას სძულხართ.

14ჩვენ ვიცით, რომ სიკვდილიდან სიცოცხლეში გადავედით, რადგან გვიყვარს ძმები; ვისაც არ უყვარს, სიკვდილში რჩება.

15ყველა, ვისაც სძულს თავისი ძმა, კაცისმკვლელია; და თქვენ იცით, რომ არც ერთ კაცისმკვლელში არ მკვიდრობს საუკუნო სიცოცხლე.

16ამით შევიცანით სიყვარული, რომ მან თავისი სული დასდო ჩვენთვის, და ჩვენც გვმართებს ძმებისთვის სულის დადება.

17ვისაც ამქვეყნიური სიმდიდრე აქვს და ხედავს გაჭირვებაში მყოფ თავის ძმას, მაგრამ ჩაკეტავს თავის გულს მის წინაშე, როგორღა დამკვიდრდება მასში ღვთის სიყვარული?

18შვილებო, ნუ გვეყვარება სიტყვითა და ენით, არამედ საქმითა და ჭეშმარიტებით.

19და ამით შევიცნობთ, რომ ჭეშმარიტებისგან ვართ, და მის წინაშე დავიმშვიდებთ ჩვენს გულს:

20თუ ჩვენი გული გვგმობს, ღმერთი ჩვენს გულზე მეტია და მან ყველაფერი იცის.

21საყვარელნო, თუ ჩვენი გული არ გვგმობს, სითამამე გვაქვს ღვთის წინაშე,

22და რასაც ვითხოვთ, მივიღებთ მისგან, რადგან ვიცავთ მის მცნებებს და ვაკეთებთ იმას, რაც მის წინაშე სათნოა.

23და ეს არის მისი მცნება, რათა გვწამდეს მისი ძის, იესო ქრისტეს სახელი და გვიყვარდეს ერთმანეთი, როგორც მან მოგვცა მცნება.

24მისი მცნებების დამცველი ღმერთში რჩება, ხოლო ღმერთი — მასში. და ამით შევიცნობთ, რომ ის ჩვენში რჩება: იმ სულით, რომელიც მან მოგვცა.