1 John 3

1Տեսե՛ք, թե ինչպիսի՜ սեր շնորհեց մեզ Հայրը, որպեսզի կոչվենք Աստծու որդիներ. և այդպես էլ կանք: Դրա համար աշխարհը չի ճանաչում մեզ, որովհետև չճանաչեց Նրան:

2Սիրելինե՛ր, այժմ մենք Աստծու որդիներ ենք, և դեռևս չի հայտնվել, թե ինչ ենք լինելու: Գիտենք, որ երբ Քրիստոս հայտնվի, Նրա նման ենք լինելու, քանզի տեսնելու ենք Նրան այնպես, ինչպես որ Է:

3Եվ ամեն ոք, ով ունի այս հույսը Նրա հանդեպ, մաքրում է ինքն իրեն, ինչպես որ Քրիստոս է մաքուր:

4Ամեն ոք, ով մեղք է գործում, անօրինություն էլ է գործում. արդարև, մեղքն անօրինություն է:

5Բայց դուք գիտեք, որ Քրիստոս հայտնվեց մեղքերը վերացնելու համար, և Նրա մեջ մեղք չկա:

6Ոչ ոք, ով մնում է Նրա մեջ, չի շարունակում մեղանչել: Ոչ ոք, ով շարունակում է մեղք գործել, չի տեսել Նրան և ոչ էլ ճանաչել է Նրան:

7Որդյակնե՛ր, թող ոչ ոք չմոլորեցնի ձեզ. նա, ով արդարություն է գործում, արդար է, ինչպես որ Քրիստոս է արդար:

8Նա, ով մեղք է գործում, սատանայից է, որովհետև սատանան ի սկզբանե մեղանչում է: Ահա թե ինչու հայտնվեց Աստծու Որդին՝ սատանայի գործերը քանդելու համար:

9Ամեն ոք, ով ծնվել է Աստծուց, մերժում է մեղք գործել, որովհետև Աստծու սերմը մնում է նրա մեջ. նա չի կարող շարունակել մեղանչել, որովհետև ծնվել է Աստծուց:

10Սրանով են զանազանվում Աստծու որդիները և սատանայի որդիները. ամեն ոք, ով արդարություն չի գործում, Աստծուց չէ, ինչպես և նա, ով չի սիրում իր եղբորը:

11Սա է այն պատգամը, որ դուք լսեցիք ի սկզբանե, որ մենք սիրենք միմյանց:

12Ոչ ինչպես Կայենը, որ չարից էր և սպանեց իր եղբորը: Եվ ինչո՞ւ Կայենը սպանեց նրան. որովհետև իր գործերը չար էին, իսկ իր եղբոր գործերը՝ արդար:

13Ուստի մի՛ զարմացեք, եղբայրնե՛ր, եթե աշխարհն ատում է ձեզ։

14Մենք գիտենք, որ մահից կյանքի անցանք, որովհետև սիրում ենք մեր եղբայրներին. ով չի սիրում, մնում է մահվան մեջ։

15Ամեն ոք, ով ատում է իր եղբորը, մարդասպան է, և դուք գիտեք, որ ոչ մի մարդասպանի մեջ հավիտենական կյանքը չի բնակվում։

16Սրանով ենք ճանաչում, թե ինչ է սերը. Հիսուս Իր կյանքը դրեց մեզ համար, և մենք ևս պարտավոր ենք մեր կյանքը դնել մեր եղբայրների համար։

17Եթե աշխարհիկ բարիքներ ունեցող մեկը տեսնի իր եղբորը կարիքի մեջ, բայց փակի իր գութը նրանից, ինչպե՞ս կարող է Աստծո սերը բնակվել նրա մեջ։

18Որդյակնե՛ր, չսիրենք խոսքով ու լեզվով, այլ՝ գործով և ճշմարտությամբ։

19Եվ սրանով պիտի իմանանք, որ ճշմարտությունից ենք, և Նրա առաջ պիտի հանդարտեցնենք մեր սրտերը.

20Եթե նույնիսկ մեր սրտերը դատապարտեն մեզ, Աստված մեր սրտերից ավելի մեծ է, և Նա գիտի ամեն ինչ։

21Սիրելինե՛ր, եթե մեր սրտերը չեն դատապարտում մեզ, վստահություն ունենք Աստծո առաջ,

22և ինչ էլ որ խնդրենք, կստանանք Նրանից, որովհետև պահում ենք Նրա պատվիրանները և անում ենք այն, ինչ հաճելի է Նրա աչքին։

23Եվ սա՛ է Նրա պատվիրանը. որ հավատանք Նրա Որդու՝ Հիսուս Քրիստոսի անվանը և սիրենք միմյանց, ճիշտ այնպես, ինչպես Նա պատվիրեց մեզ։

24Ով պահում է Նրա պատվիրանները, մնում է Աստծո մեջ, և Աստված՝ նրա մեջ։ Եվ սրանով ենք իմանում, որ Նա մնում է մեր մեջ՝ այն Հոգու շնորհիվ, որ Նա տվեց մեզ։