1 John 3

1የእግዚአብሔር ልጆች ተብለን ልንጠራ አብ እንዴት ያለውን ፍቅር እንደ ሰጠን እዩ። እንዲሁም ነን! ዓለም እኛን የማያውቅበት ምክንያት እርሱን ስላላወቀው ነው።

2ወዳጆች ሆይ፥ አሁን የእግዚአብሔር ልጆች ነን፥ ምን እንደምንሆንም ገና አልተገለጠም። ክርስቶስ በሚገለጥበት ጊዜ፥ እርሱ እንዳለ እናየዋለንና እርሱን እንድንመስል እናውቃለን።

3በእርሱም ይህ ተስፋ ያለው ሁሉ፥ ክርስቶስ ንጹሕ እንደ ሆነ ራሱን ያነጻል።

4ኃጢአትን የሚያደርግ ሁሉ ዓመፅን ደግሞ ያደርጋል። በእርግጥም ኃጢአት ዓመፅ ነው።

5ነገር ግን ክርስቶስ ኃጢአትን ሊያስወግድ እንደ ተገለጠ ታውቃላችሁ፥ በእርሱም ኃጢአት የለም።

6በእርሱ የሚኖር ማንም ኃጢአት ማድረጉን አይቀጥልም። ኃጢአት ማድረጉን የሚቀጥል ማንም አላየውም ወይም አላወቀውም።

7ልጆች ሆይ፥ ማንም አያስታችሁ፤ ክርስቶስ ጻድቅ እንደ ሆነ ጽድቅን የሚያደርግ እርሱ ጻድቅ ነው።

8ኃጢአትን የሚያደርግ ከዲያብሎስ ነው፤ ዲያብሎስ ከመጀመሪያው አንሥቶ ኃጢአትን ያደርጋልና። የእግዚአብሔር ልጅ የተገለጠው የዲያብሎስን ሥራ እንዲያፈርስ በዚህ ምክንያት ነው።

9ከእግዚአብሔር የተወለደ ማንም ኃጢአትን ከማድረግ ይከለከላል፥ የእግዚአብሔር ዘር በእርሱ ይኖራልና፤ ከእግዚአብሔርም ስለ ተወለደ ኃጢአት በማድረግ ሊቀጥል አይችልም።

10የእግዚአብሔር ልጆችና የዲያብሎስ ልጆች በዚህ ይለያሉ፤ ጽድቅን የማያደርግ ማንም ከእግዚአብሔር አይደለም፥ ወንድሙንም የማይወድ እንዲሁ ነው።

11ከመጀመሪያ የሰማችኋት መልእክት፡ እርስ በርሳችን ልንዋደድ ይገባል የምትለው ይህች ናት።

12ከክፉው ወገን እንደ ነበረ ወንድሙንም እንደ ገደለ እንደ ቃየል አትሁኑ። ቃየልስ ለምን ገደለው? የገዛ ሥራው ክፉ፥ የወንድሙ ሥራ ግን ጻድቅ ስለ ነበረ ነው።

13እንግዲህ ወንድሞች ሆይ፥ ዓለም ቢጠላችሁ አትደነቁ።

14እኛ ወንድሞቻችንን ስለምንወድ ከሞት ወደ ሕይወት እንደ ተሻገርን እናውቃለን፤ ፍቅር የሌለው በሞት ውስጥ ይኖራል።

15ወንድሙን የሚጠላ ሁሉ ነፍሰ ገዳይ ነው፤ ነፍሰ ገዳይም የሆነ ሁሉ የዘላለም ሕይወት በእርሱ እንደማይኖር ታውቃላችሁ።

16ፍቅር ምን እንደ ሆነ በዚህ እናውቃለን፤ ኢየሱስ ስለ እኛ ነፍሱን አሳልፎ ሰጥቶአልና፥ እኛም ስለ ወንድሞቻችን ነፍሳችንን አሳልፈን እንድንሰጥ ይገባናል።

17ነገር ግን የዚህ ዓለም ሀብት ያለው፥ ወንድሙ ተቸግሮ እያየ ምሕረቱን የነፈገው፥ የእግዚአብሔር ፍቅር በእርሱ እንዴት ይኖራል?

18ልጆቼ ሆይ፥ በሥራና በእውነት እንጂ በቃልና በአንደበት አንዋደድ።

19ከእውነት እንደ ሆንን በዚህ እናውቃለን፤ በፊቱም ልባችንን እናሳርፋለን፤

20ልባችን እንኳ ቢነቅፈን፥ እግዚአብሔር ከልባችን ይልቅ ታላቅ ነውና፥ ሁሉንም ያውቃል።

21ወዳጆች ሆይ፥ ልባችን የማይነቅፈን ከሆነ፥ በእግዚአብሔር ፊት ድፍረት አለን፤

22ትእዛዛቱንም የምንጠብቅና በፊቱ ደስ የሚያሰኘውን የምናደርግ ስለ ሆንን የምንለምነውን ሁሉ ከእርሱ እንቀበላለን።

23ትእዛዙም ይህች ናት፤ በልጁ በኢየሱስ ክርስቶስ ስም እንድናምንና ትእዛዝ እንደ ሰጠንም እርስ በርሳችን እንድንዋደድ ነው።

24ትእዛዛቱንም የሚጠብቅ በእግዚአብሔር ይኖራል፥ እግዚአብሔርም በእርሱ ይኖራል። በእኛም እንደሚኖር በሰጠን በመንፈሱ እናውቃለን።