1 Corinthians 13

1በሰዎችና በመላእክት ልሳን ብናገር፥ ፍቅር ግን ከሌለኝ እንደሚጮኽ ናስ ወይም እንደሚንሽዋሽዋ ጸናጽል ሆኛለሁ።

2ትንቢትም ቢኖረኝ፥ ምሥጢርን ሁሉና እውቀትን ሁሉ ባውቅ፥ ተራሮችንም እስካፈልስ ድረስ ፍጹም እምነት ቢኖረኝ፥ ፍቅር ግን ከሌለኝ ከንቱ ነኝ።

3ያለኝንም ሁሉ ለድሆች ባካፍል፥ ሥጋዬንም ለመቃጠል አሳልፌ ብሰጥ፥ ፍቅር ግን ከሌለኝ ምንም አላተርፍም።

4ፍቅር ታጋሽ ነው፥ ፍቅር ቸር ነው፤ ፍቅር አይቀናም፥ አይመካም፥ አይታበይም፤

5ተገቢ ያልሆነውን አያደርግም፥ የራሱን አይፈልግም፥ አይበሳጭም፥ በደልንም አይቆጥርም፤

6ከእውነት ጋር ደስ ይለዋል እንጂ በዓመፅ ደስ አይለውም፤

7ሁሉን ይታገሣል፥ ሁሉን ያምናል፥ ሁሉን ተስፋ ያደርጋል፥ በሁሉም ይጸናል።

8ፍቅር ከቶ አይወድቅም፤ ትንቢት ቢሆን ግን ይሻራል፥ ልሳናት ቢሆኑ ይቀራሉ፥ እውቀትም ቢሆን ይሻራል።

9ከእውቀት ከፍለን እናውቃለንና፥ ከትንቢትም ከፍለን እንተነብያለንና፤

10ፍጹም የሆነው ሲመጣ ግን በከፊል የሆነው ይሻራል።

11ሕፃን ሳለሁ እንደ ሕፃን እናገር ነበር፥ እንደ ሕፃንም አስብ ነበር፥ እንደ ሕፃንም እቈጥር ነበር፤ ጎልማሳ ሆኜ ግን የሕፃንነትን ነገር ሽሬአለሁ።

12አሁን በመስተዋት በድንግዝግዝ እንደምናይ ነን፥ በዚያን ጊዜ ግን ፊት ለፊት እናያለን፤ አሁን ከእውቀት ከፍዬ አውቃለሁ፥ በዚያን ጊዜ ግን እኔ እንደ ታወቅሁ እንዲሁ ሙሉ በሙሉ አውቃለሁ።

13አሁንም እምነት፥ ተስፋ፥ ፍቅር እነዚህ ሦስቱ ጸንተው ይኖራሉ፤ ከእነዚህም የሚበልጠው ፍቅር ነው።